1Pe 2 | ZomZIV | STEP | Tua ahi manin etsatna khempeuh, khemna khempeuh, kineih-siamna, enna le mindaisakna namkimte na paikhia un.

1 Peter 2

1 Tua ahi manin etsatna khempeuh, khemna khempeuh, kineih-siamna, enna le mindaisakna namkimte na paikhia un. 2 Note hotkhiatna ah na khantoh theih nadingun naungek suak tungte bangin khalam nawizu siangtho na lunggulh un; 3 tu-in Pasian hoihna na ciam khin zo uh hi. ^a

A Nungta Suang le a kiteel mi

4 Mite in a nial, ahi hanga Pasian in a teelsa, ama adingin a manpha a nungta Suang kiangah nong pai bangun, 5 note zong Pasian san theih dingin Jesu Christ tungtawna khalam biakpiakna a bawl siampi siangtho dingin khalam inn-a kilam a nungta suangte bang na hi uh hi. 6 Ahang in, Laisiangtho in: ^b

“En in, a kiteeltuam
a manpha innkiubul suang khat
Zion ah ka koih zo hi;
amah a muang mi, a zahlak ngei kei ding hi,” ^{▼▼2.6 Isa. 28:16} ci hi.

7 Tu-in a um note adingin hih suang a manpha hi, ahi hangin a um lote adingin, ^d

“Inn lamte nilkhiat tua suang
inntungkhum suang a suak zo hi, ^{▼▼2.7 Ahikeh innkiu-suang}“ ^{▼▼2.7 Ph. 118:22} ci a,

8 tua ciangin,

“Mite a kimuktusak ding suang le,
amaute puk nading suangpi,” ^{▼▼2.8 Isa. 8:14} ci hi.

Amaute in thupuak mang lo uh ahi manin a kimuktu uh hi - tua zong amaute a tuaci ding mah a laitansa ahi hi.

9 Ahi hangin note na hi uh leh khuamial sung pan hong samkhia-a, ama khuavak lamdang sunga hong tunpa phatna na tangko theih nadingun hong teeltuam mi pawl, kumpi nam, siampi, minam siangtho, Pasian mite na hi uh hi. 10 Khatvei lai-in minam na hi lo uh hangin tu-in Pasian mite na hi uh hi; khatvei lai-in lainatna na ngah loh uh hangin, tu-in lainatna na ngah uh hi.

11 Kong it lawmte aw, na kha uh hong do den, mawhdim lunggulhnate pana kidek dingin leitung ah gamdang mite le mikhualte bangin kong kun hi. 12 Lawkite lakah tua bang nuntakna hoih na nungta un. Amaute in a khiala hong ngawh uh hangin, na gamtatna hoihte uh mu thei ding uh a, Pasian in eite hong veh ni ciangin amah a minthangsak ding uh hi. ^h

Gam-ukte le Pute Tunga Kiniamkhiatna

13 Mite lakah a kiguang thuneihna khempeuh: thuneipipen kumpipa ahi zongin, 14 a khialte gawtna a pia ding le a maana gamtate a phat dinga a sawl ukpite thu khempeuh Topa hangin na mang un. 15 Ahang in, a hoih na sep uh hanga mihaite haipaunate na daihsak ding uh Pasian deihna ahi hi. 16 A suakta mi bangin na nungta un; ahi hangin na suahtakna uh gitlohna khuhna-in na zang kei unla, Pasian nasemte bangin na nungta un. 17 Mi khempeuh a kilawmin na zahtak un. Thu-um te unau khat suahna na it unla, Pasian kihta in kumpipa na pahtawi un. ⁱ

18 Silate aw, no hong khuala no tunga hong migite bek hi lo, no tunga hong gamhtat na pute uh tungah zong zahtakna kim tawh na kiniamkhiat un. 19 Ahang in, mi khat in Pasian a phawk manin a man lopi in natna a thuaka a thuak zawh leh a phattak ahi hi. 20 Ahi hangin a man lo nasepna hangin satna na thuak uh a, na thuak zawh uh hangin a hoih bang lawhtak na hi uh hiam? Ahi hangin na hoih na sepna uh hangin na thuak uh a, na thuak zawh uh leh Pasian mai-ah a phattak na hi uh hi. 21 Hih ding mah a note hong kisam ahi hi, bang hang hiam cih leh Christ in note adingin thuak khin zo a, ama khekhap na zuih dingun etteh dingin hong nusiat hi. ^j

22 “Amah in mawhna bawl lo a, ^k
ama kam sungah zong khemna a kimu kei hi,” ^{▼▼2.22 Isa. 53:9}

23 Amaute in amah a zahko uh ciangin thukkik lo a, a thuak laitakin a tawng thuk kei hi. Tua sangsikin tangtaka thukhenpa tungah amah le amah a ki-ap zaw hi. 24 Mawhnate i sihsan theih nading le thumaanna i nuntakpih theih nadingin ama pumpi mahmah in i mawhnate sing tungah pua zo hi. Ama liammate hangin note hong kidamsak zo hi. 25 Ahang in, note a pialmang tuu tawh na kibang uh a, ahi hangin tu-in na khate uh a Cingpa le a Kempa kiangah na ciah kik zo uh hi. ^m